12 October 2013

台南市,台北,新竹_內灣 2012-10-14to19 - Part.06-上 (19Oct)

台南市,台北,新竹_內灣

19 oct 2012 Fri 新竹-內灣老街 Sunny Day

因地點比較遠左少少,所以6點起身6點3就要出門口,搭捷運到左台北車站時間尚早,研究左車站既自動售票機(只有對號列車即莒光自強號果d有得賣無區間車票賣),等左陣就上得車,我係搭7點由台北去新竹既高鐵,價錢唔平(要成290蚊台幣),但時間快好多(搭台鐵要1個鐘8個字而高鐵只要30分鐘,但價錢都係爭果30零蚊港紙,因第二程既區間車一個鐘得一班,所以都係比貴少少好d),去到新竹高鐵7點半,行過去六家台鐵站買飛由六家去竹中再轉車去內灣,一次過買票34蚊台幣,都算幾平,車一早睇左所以較岩時間等左陣就由竹中上左內灣既車,原來竹中轉內灣既車只係對面平台,所以好快就到,唔用驚走車,上左車去內灣總站要一個鐘,車速比較慢而且架車好細,難怪假日會迫死,當中經過某一站有班小朋友上車,即時比佢地嘈醒晒,但見佢地成班細細個咁都幾過癮

之後經過左我本身planning既合興站仲見一個比較舊少少既富貴站好快就到左內灣,去到未夠9點,出到去車站無咩人,去左個廁所再出老街搵下野食,但因時間太早而且係平日,唔多檔口開,之後入左一間有本地人既鋪,諗住應該唔難食,但原來果個人唔係食野而係打牙較既,依個係一間頗家庭式既舊鋪,無咩野食就叫左個抄麵同奶茶,一早唔想飲凍野諗住要個熱既,點知佢問我要冰的還是暖的,心知不妙,果然暖奶茶好難飲而個抄麵亦好難食,好彩我係一個唔多揀擇既人,所以最後都係食晒,飽左肚就可以行下,因時間話多唔多(我搭9點機要7點番到機場,一個鐘內灣車半個幾鐘高鐵加巴士到機場,而且要預多個鐘係合興站,即3點果架車走人)

第一站去左車站後面既內灣派出所,全日式木造設計,幾特別,但因地方問題,好難影到晒全景相,後尾見警察出左黎,同佢打個招呼影左陣相就走人,因見廣濟宮好近,所以行番落火車軌走過對面入左廣濟宮睇睇,地方唔算太大,而且間廟外型比較新,入左去睇左陣就走人,最特別係順風耳同千里眼既神像,一紅一綠咁,頗特別

之後行番車軌入左小路去左加水站遺跡,路軌旁有小屋,打過招呼後影完相轉眼見有間屋生晒草想行入少少影睇下,屋主太太捉住我話入面冇路,仲講之前因山泥傾瀉沖爛左間屋,d人搬走晒,仲講山上面係點有水同d水點入加水站等等,講左陣我就走人了,食個地方係火車軌旁既轉彎位,感覺頗日式,但冇火車影相硬係爭少少,因一個鐘先一班,所以冇等火車就走人,點知行左一分鐘唔夠架火車就黎,等多陣就好了,不過算了,去旅行我比較隨緣的,見就見到唔見都唔會太介意,始終唔係番工,唔用比太大壓力自已,無論景點天氣等等,take it easy會開心好多

本身想搵內灣95號既日式老屋,但上山搵左陣都唔見,之後見到木馬道遺址(仲有營火蟲區),就行左陣去睇睇,見到生晒青苔咁,睇黎唔太多人行,因時間問題,冇入去睇就轉頭,再行番去內灣小學既後山都係唔見95號屋,見咁多民宿係度,可能比人拆左都唔奇,所以就經內灣小學去搵地磅遺跡,經過小學因係平日所以有學生上緊堂,果度有個大笨象石滑梯,仲有小朋友玩緊,幾有趣,之後見劉興欽漫畫館,佢係台灣好耐之前出名漫畫家,其實內灣好多佢既漫畫人物既公仔,不過我唔太認識佢,所以冇入漫畫館就行左去搵地磅

地磅唔太難搵,開頭以為係地下既銀色東西,原來係佢旁邊一間石屋入面既大磅,但好似冇咩保養,有d雜草咁,影左相睇下地下既舊車軌就走人了,好多蚊

之後行左去附近既內灣吊橋,仲見到條蛇係地,兩尺零唔算太大條,見佢走番入草叢影唔切相,行左上吊橋,因有石碇以係好穩但行下上黎都有少少郁,下面既河水都幾清澈,之後行左過對面睇地圖好似冇咩咁,行番轉頭見有字指住可以落河床,所以行左落去,點知都係到左一半,我以為可以落條河度添,番上路面再睇下地圖,見有櫻花散步道同埋南窩田園而且直去就係攀龍吊橋,雖然唔係櫻花季節,但係河邊景色應該唔錯,所以再次行過內灣吊橋過左對面行,有d cafe有d民宿,有d似清境,但唔知櫻花散步道係邊行左陣見到有條古道可以健行,但我冇咁既時間加上太晒而且諗諗下攀龍吊橋好似太耐無人理行唔到過對岸,所以都係番轉頭由老街果邊過會穩陣少少,一個人就有好處可以唔用太理其他人自己想點都得,而同朋友始終要顧住對方驚人悶驚人睏驚人熱死晒死等等,所以多數last day去台北我都係自己搵地方行老街

轉頭由內灣新橋過內灣老街,鋪開多左但都係人少同冇咩野食,因攀龍吊橋比較遠,所以睇左順便行內灣戲院先,外表真係好古祖感入面地方唔大,賣既野比較傳統,而佢隔離既糖果店賣既糖都好舊式下,但因之前去過日本既川越,果條果子屋橫町都係依d野,所以睇左陣就走人,諗住晏畫食lunch時再睇

見到林務局(本身plan如有時間會入去睇,但就黎12點所以就唔入lu),再行前少少見到內灣天主堂,比想像中靚,再行前少少去左一條舊少少而非遊客地方,見到間郵局佢旁邊既屋都幾舊下,仲係木門咁,而且露台都幾古舊,行前少少有間士多,有個阿叔坐係門口冇野做,我行埋去買左支雪條,又係古祖感覺,叫傳統枝仔冰,食落真係好raw,只係少少糖水加d水雪凍左,就係咁簡單,即時覺得自己去番幾十年前,有趣,基本上我去親ed地方都唔會客氣當晒自己屋企一樣,見門口有椅就坐係度慢慢食雪條,對面有條黑狗比人縛左係度,見佢對住個太陽訓又成身黑色,見到都覺佢熱,但佢可能好爽都唔奇

食完古祖冰繼續直行,去搵庄頭伯公廟,無咩特別,只係佢前面果兩隻獅子好趣怪,仲見到有隻黃蜂拖住隻死蜘蛛係度周圍行唔知想點咁,另佢後面果棵500年既茄苳樹,真係唔講都唔知咁耐,再行呢就係九芎坪隧道(沿高速公路行,有可能會被車死),個牌講係柳暗花明又一村,入去內灣時miss左我就由佢旁邊既洞伸個頭入去望望,嗯,好黑,隊部機入去影左幾張相走人了(btw,此乃危險動作,觀眾切勿模仿)

Back to Part.06(下) - 內灣老街

[14to19/10/12]
Photo Link <<<<<<<<<<<<<<<

No comments: