4點半起身之後好快就趕住行出巴士站了,路只有一小段較黑其他都有燈光(之前搵到條小路可以行快D但黑蚊蚊都係行馬路會好D),5點3去到巴士站,已有車係度不過得小貓3-4隻,比司機睇左張TICKET,對岩就放行李上車,等左陣就有一間鋪頭開門,因無食早餐但又唔知車程有無廁所位,所以買左無咁口渴既開心果食,但可能有機會肚餓又買多左包朱古力餅,之後等左陣5點半就上車了
車雖然舊但無緬甸既咁殘(我指LOCAL BUS),起碼窗只爛少少椅都叫做仲可以,不過係總站無咩人上車,之後就開始一路行一路不停上人, 有人帶好多貨上車但有時只上貨唔上人(聽到係100k),至於上車既貨就真係好多,個情況同緬甸差唔多不過依度既係一路行一路上貨而緬甸就係總站上晒同PACK好晒先開車,巴士除左載人仲會載貨,係muang
long仲做埋郵差送信添,其實咁都幾環保下(窮就係環保,哈),不過一多貨就有排攪,有人仲上左 D有水既物體上車,幾桶野放左係行李箱,好彩我行李唔係車尾箱,唔係就算有RAIN COVER都濕(上次唔記得去邊度無落 COVER就上LOCAL
BUS,咁就整濕左我件羽絨洗左我百幾蚊)
雖然行下停下,但都算準時5點開車10點左右已到永珍(Vientiane),睇GPS架車會經過我間GH,所以差唔多時就叫停架車,真係度度停得真方便
去到GH未可以CHECK IN,所以只換左條褲羅左D野就放行李係度就再出去了,先去食LUNCH,行左去Wat Ong Teu附近既Pha Khao Lao食,話係best selection of Lao food wor,但行左5min先去到又未開門,所以就行多十分鐘去cultural
hall附近既Pho Dung食,因岩岩lunch hour都好多當地人食,想叫牛雜湯不過望落得牛肉同牛楠,咁就叫左個大碗牛肉仲要左個可樂,米粉黎到仲連好大盆菜同成碗芽菜,正,仲有冰茶送,早知唔要可樂,食緊時見有幾個人同時食緊差唔多既野,都想試下,指左佢地個碗同叫左細碗份量點知條友唔明又係黎碗牛肉,算了照食不過牛肉仲算ok,但好似有味精,埋單唔記得幾錢不過唔平唔貴咁啦
食完想去附近既廟行下,但時間剛好close,就搵左間望落都可以但感覺又唔會貴死人既地方飲laos
coffee,當然要冰咖啡啦,依度真係好熱,我覺得龍坡邦最凍一早一晚真係有少少凍到震而旺陽可能有山擋,所以相對黎講無咁凍而永珍呢就真係熱,唔郁都係咁出汗,仲要我係12點幾行咁遠路,又食熱米粉,就暈,所以搵左間野坐底飲下凍野寫下積左幾日未寫既旅行日記,爽
Hea左大半個鐘差唔多一點就行了,先去左附近既Sisaket
Museum,經過總統府,門口好多警察同士兵,而順手遠距離咁望到凱旋門,zoom埋去影左張相就入廟了,入場費只係5000比LPB平,正殿係中間三邊有迴廊,有好多佛像係度,唔同型態咁啦,入左正殿睇,還可,之後就去左另一間Wat
Ho Phra Kaew,依個比較古舊,外牆有龍圍繞,門既裝飾都唔錯有舊壁畫係度,但入面就唔比影相(佢只係寫no photo inside,我以為佢話唔比易入面既佛像tim),殿入面既頂都幾靚
睇完就開始搵車去香崑廟(Wat Xieng Khuan/Buddha Park)同塔鑾寺(Pha That
Luang),資料寫40k+50k來回,我想比70k但問到原來香崑要400k唔係40k,唔知係咪寫錯定條友亂開價,所以最後揀左去Talat Sao Station搵14號巴士,只要60k但要坐1個鐘,去到泰寮邊境就要落車,之前仲有細van connect但後來無左,局搭tuktuk去香崑,資料上寫5k-10k但見佢標價40k又係貴死,還價30k佢話ok早知講20啦,坐去香崑條路非常大塵同有少少登,不過經過唔多次坐爛泥路既經驗,ed登法唔算得係咩,差唔多20min先到香崑
5k+2k影相費,入面既佛像都幾奇特,而且入口附近果個好似沙葛既東西最有型(英文叫Heaven-hell pumpkin),入口真係一個口咁爬入去,入到去有兩隔,外面可由細窗睇到出面,而入面果隔就係好多石像,以地域為主題,再上又係另一層地獄不過好似無下面果層咁慘,再上就係佛像不過依度開始好熱,再上就係更窄既樓梯(闊度細過隻腳)由另一口爬出去頂層,周邊唔太闊不過好開揚,望上去就係一棵樹(生命樹),由依度睇出去見到地面有好多唔同型態既佛像
以一個大臥佛同四面佛最為搶眼,其實d佛真係有d似泰國又或者柬埔寨見過既佛,我見到有三頭象有鱷魚有龜等等,大約睇過應該係導人向善唔好爭鬥既意思
[25/01/14 to 10/02/14]
Photo Link
<<<<<<<<<<<<<<<<
No comments:
Post a Comment